Retinoli dhe roli i tij në lëkurë

Lëkura është indi më i gjerë dhe më i bollshëm në trupin e njeriut. Ashtu si shumë organe, ndërsa plakemi, lëkura e njeriut përjeton atrofi graduale si në epidermë ashtu edhe në dermë. Kjo mund t'i atribuohet kryesisht zvogëlimit të numrit të qelizave burimore epidermale dhe reduktimit të kolagjenit, i cili është proteina strukturore kryesore në trupin e njeriut. Ndryshimet që ndodhin në epidermë dhe dermë për shkak të proçesit të plakjes rezultojnë në ndërprerje të funksionit barrierë të lëkurës.

Ky blog thekson zbulimet e fundit molekulare në lidhje me plakjen e lëkurës dhe vlerëson qasjet parandaluese, siç është përdorimi i retinoideve aktuale. Retinoidet aktuale kanë treguar rezultate në përmirësimin e teksturës së lëkurës, reduktimin e rrudhave të holla dhe mbrojtjen e shtresave epidermale dhe të lëkurës.

Retinoli është një lloj retinoidi, një formë e vitaminës A, e përdorur në kujdesin e lëkurës për të trajtuar aknet dhe për të reduktuar shenjat e plakjes. Si një përbërës për kujdesin e lëkurës, retinoli ndihmon në rritjen e prodhimit të qelizave dhe kolagjenit për ta bërë lëkurën më të lëmuar dhe më të njëtrajtshme.

Përdorimet e Retinolit

• Retinoli mund të ndihmojë në trajtimin e llojeve të ndryshme të akneve dhe poret e bllokuara. Aknet shfaqen kur qelizat e vdekura të lëkurës, ose yndyra, bllokojnë poret tuaja, duke shkaktuar pika të bardha, pika të zeza ose akne aktive.
• Retinoli ndihmon gjithashtu në trajtimin e hiperpigmentimit - njollave të errëta ku keni më shumë pigment të lëkurës të shkaktuar nga ndryshimet hormonale, dëmtimi nga diellit ose njollat nga aknet. Rritja e qarkullimit të qelizave ndihmon në eksfolimin e lëkurës, duke zbutur shtresën e jashtme të lëkurës dhe duke lejuar qelizat e reja të lëkurës të rriten më shpejt. Kjo ndihmon në homogjenizimin e tonit të lëkurës.
• Me kalimin e moshës, ju humbni kolagjenin dhe elastinën që ndihmojnë në mbajtjen e lëkurës të shëndoshë dhe elastike. Kur lëkura fillon të hollohet dhe të humbasë elasticitetin, lëkura fillon të shfaqë rrudha. Retinoli nxit prodhimin e kolagjenit dhe elastinës, duke përshpejtuar qarkullimin e qelizave dhe trashjen e lëkurës. Kjo ndihmon në zvogëlimin e pamjes së rrudhave të imta dhe ekzistuese.

Mekanizmi i veprimit të Retinolit

Aplikimi lokal i Retinolit në lëkurë çon në transformime të jashtëzakonshme si në epidermë ashtu edhe në dermë, duke ndikuar kryesisht në tre kategori kryesore të qelizave të lëkurës: keratinocitet epidermale, fibroblastet e lëkurës dhe qelizat endoteliale. Retinoli ushtron një ndikim thelbësor në trashësinë e epidermës duke aktivizuar qelizat staminale IFE dhe duke nxitur përhapjen e keratinociteve epidermale.

Për më tepër, vaskularizimi i shtuar i lëkurës i shkaktuar nga aplikimi lokal i këtij përbërësi magjik nxit qarkullimin e gjakut në lëkurë, duke krijuar kështu një mikromjedis më të favorshëm si për përhapjen e keratinociteve epidermale ashtu edhe për aktivizimin e fibroblasteve të lekures.
Marrëdhëniet e ndërlidhura midis përhapjes së keratinociteve, rritjes së qelizave endoteliale dhe aktivizimit të fibroblasteve të lëkurës krijojnë një mjedis, i cili është përgjejgjës për efektet e jashtëzakonshme kundër plakjes që i atribuohen Retinolit.

Cili është përqëndrimi më i efektshëm i Retinolit?

Dermatologët sugjerojnë që përqendrimet 0.3% deri 1% të retinolit janë efektive në trajtimin e problematikave që përmendëm më sipër. Përdorimi i retinolit 0.3% u shoqërua me më pak efekte anësore kur aplikohej çdo ditë. Prandaj ai mund të tolerohet më mirë se Retinol 0.5% dhe 1%, duke lejuar kështu aplikimin lokal afatgjatë.

Retinoli dhe përdorimi si Peeling

Peeling kimik të fytyrës janë shumë të kërkuar nga pacientët me lëkurë të dëmtuar nga dieli, akne dhe melasma. Një studim klinik me peeling sipërfaqësor, që përmban 3% retinol dhe përbërës të tjerë forcues dhe volumizues, u zhvillua për të eksfoliuar, përmirësuar pamjen e rrudhave të imta, duke dhënë një pamje të shndritshme dhe të njëtrajtshme. Ky studim u krye për të vlerësuar tolerueshmërinë, sigurinë dhe efikasitetin e peeling-ut 3% me retinol tek femra të moshës 18-65 vjeç, me problematika të ndryshme. Përfitimet u vëzhguan në të gjitha grupet dhe u mbështetën nga pjesëmarrësit. Fotografia dixhitale tregoi tolerancë në ditët menjëherë pas proçedurës.

Si përfundim, trajtimi peeling me Retinol 3% u tolerua mirë nga të gjitha tipologjitë e lëkurës, duke rezultuar në një përmirësim të teksturës dhe tonusit të lëkurës.

Ndërveprimet e mundshme

Retinoli mund të ndërveprojë me përbërës të tjerë aktivë për kujdesin e lëkurës dhe të irritojë lëkurën. Disa përbërës të zakonshëm për kujdesin e lëkurës që mund të shmangni në kombinim me retinolin përfshijnë:

• Vitaminën C;
• Peroksid benzoilin;
• Betahidroksi Acidet (BHAs) si acidi salicilik;
• Alfahidroksi Acidet (AHA) si acidi glikolik.

Retinoidet njihen për efekte pozitive si kundër plakjes ashtu edhe në lëkurën e prirur ndaj akneve. Retinoli është forma më e aksesueshme e retinoideve, si dhe zgjidhja më e mire dhe më e tolerueshme. Megjithatë, mund të duhen disa muaj përdorim të vazhdueshëm përpara se të shihni rezultate. Konsideroni të kontaktoni një specialist të fushës përpara se të blini një produkt specifik retinol. Ata mund të kenë njohuri të mira, veçanërisht nëse janë të njohur me lëkurën tuaj.

Referenca:

1. Human Skin Aging and the Anti-Aging Properties of Retinol, Joshua T. Morgan, Academic Editor and Shantan Pradhan, Academic Editor
2. https://www.health.com/retinol-benefits-7152524
3. Multifaceted amelioration of cutaneous photoageing by (0.3%) retinol, Kieran T Mellody^1 2, Eleanor J Bradley ³, Bezaleel Mambwe ¹, Lindsay F Cotterell ^1 2, Orsolya Kiss ^1 2, Poonam Halai ^1 2, Zeena Loftus ³, Mike Bell ³, Tamara W Griffiths ^1 2, Christopher E M Griffiths ^1 2 4, Rachel E B Watson ^1 2 4
4. An Advanced, Physician-Strength Retinol Peel Improves Signs of Aging and Acne Across a Range of Skin Types Including Melasma and Skin of Color,
   Neil Sadick MD,a,b Brenda L. Edison BA,c Gabriella John MS,c Krista L. Bohnert BS,a Barbara Green RPh MSc